KAHTAWLIK HPUNG MASHA TAI SAI HTE HKAM LA LU AI MYI HTE MU LU AI KUMHPA NI ( NKAU NI )

 

Kahtawlik hpung masha tai sai hte Myi hte mu lu ai lawu na kumhpa ni hkam la lu nga ai.  Kahtawlik Nawku hpung kawn pru mat jang yawng shamat kau sai rai.

 

1. Kashin kamun hte Chyeju kumla ( 7)

2. Chyoipra mying.( ex.Luka, Maria )

3. Nawku Tawn

4. Rosary

5. Shaman ntsin

6. Wudang sumla

7. Chyoipra ai sumla ni

8. Sanpra ai ni a garum shingtau lam

9. Chyoipra ai Nu Maria a garum shingtau lam lu la mai ai

10. Si ai ni a matu akyu hpyi ya mai ai

11. Sarabyin, Saradaw, jau, mama, Brother, Tarahkaw sara zawn re chyoipra ai amu gun hpai lu ai

12. Tengman kup tsup ai makam masham & Nawku hpung

13. Kumla hte Akyu hpyi lu ai ( Wudang masat, Lahput hputdi, Baw gum,..)

14. Chyum Laika 77 lu ai. (66 + 7)

15. Htani htana asak jan mau

16. Ladaw hte ladaw nawku lu ai ( ex. Lusha gam = purple color, Pranwan ladaw = green color ... )

17. Akyu hpyi hpan amyu myu lu ai ( Missa Hkungga, Novena, Rosary hti, Chyoipra hkum sin, Poi shingra nawku hpan... )

18. Makam hte rau mai kaja ai bungli hpe gumhpawn mai galaw ai.

19. Nawku hpung a manu dan ai labau lara, matsun maroi ni nga ai ( Yesu a prat kawn daini na ten du hkra, tsaban 1-21)

20. Sasana wuhpung (Religious) ni law law lu ai.

21. Trinita or Atai langai marai masum re Karai Kasang lu ai. (Kawa, Kasha, Chyoipra ai Wenyi )

 

 

CHYEJU KUMLA ( SACRAMENTS) NI.

1. KASHIN KAMUN (BAPTISM ) 

 

    Ningpawt Mara hpe shatsai ya ai. Karai a kasha shatai ai. Adam hte Eva prat kawn shamat kau sai chyeju ni bai lu la sai. Dai chyeju ni gaw, Hkum tsup re Chyeju Ning Sang, Chyopra San Seng ai, Hpung shingkang arawng sadawng, Karai Kasang hte rau nga lu ai, Htani htana asak ni lu la ai lam ni re. Lak san Kumhpa (3) mung hkam la lu ai; dai ni gaw, 1. Hkaw hkam amyu lata la ai amyu tai sai. tsadan a mayam prat kawn lawt sai. 2. Jau, Hkinjawng amyu tai sai. Nang hkum nan Direct Karai Kasang hpe Nawku Daw jau lu sai. 3. Myihtoi Amyu tai lu sai. Tinang hkam la lu ai Kabu gara shiga, makam masham lam ni hpe gam garan (sharing) galaw lu ai. Sakse hkam lu ai. Tara Mungga ni hpe hkai dan, htai dan lu ai. Tsawra matsan dum lama bungli ni galo lu ai.( matsing: mungkan ga galoi htum na nga nna hkaw tsun ai ni myihtoi masu rai na re)

    Kashin kamun hpan (3) nga ai. 1. Hka hte Kashin kamun hkam ai. Kahtawlik hpung masha yawng go Hka hte Kashin kamun hkam la ga ai. Hka hte kashin yang hpa arai mung agang chyalang ko nna san seng wa lu ai zawn Ningpawt mara( original sin) hpe mung Karai Kasang a Chyeju hte shatsai kau ya sai. ningpawt mara hpe kaja wa shatsai lu ai go hka nrai Karai a Chyeju hte sha rai nga ai. Shani tup tup Hka kata bang da tim, Hkanu de sa shin tim, lagawt kashin tim, Hka singgat ko agre kashin tim Karai Kasang achyeju nlawm yang hka hte sha Ningpawt mara hpe shatsai kau lu na nre. Shingrai hka hpe gaw lawt lu ai, shatsai kau ya ai Kumla hku lang ai rai nga ai. Mungkan mungdan ni a lamu ga ni hpe hka hte madin masat galo chye ma ai. Moi Isteal ni Nawng Hkyeng rap ai hte mayam prat kawn lawt lu ma ai.

    Chyum laika hte Nawku hpung a labau hpe yu yang Hka hte lapri ai. Hka hta lup ai. Hka Jaw ai ladat ni lang lai wa yu sai. Ya ten Kahtawlik ni jai lang ai Kashin Kamun gaw Ma chyangai ni a Kashin kamun ( Infant Baptism ) rai nga ai. Nawku hpung a Sasana hta, ma nnan shangai ai ni kon Yup ra ko taw nga ai dingai dingla ni a matu du hkra htuk manu ai ladat re hpe mu mada nna jai lang nga ai.

2. Sai (Blood )hte Kashin kamun hkam ai. Makam masham a majaw, Tengman lam, Mai kaja lam a majo zingri sat kau hkrum, Asak ap nawng kau sai ni gaw sai hte kashin kamun hkam ai ni rai ma ai.

3. Myit hte kashin kamun hkam ai. Tengman ai makam masham a lam hpe kadai sa tsun dan, hkaw dan ai wa nnga majo hpung masha ntai tim Myit masin dingman ai ni, Mai kaja ai sak prat hta hkawm sa ai ni go Myit hte kashin kamun hkam la ai ni rai ma ai. Kashin kamun hpe kadai ni mai hkam la na kun nga san yang Karai Kasang hpe Wa ngu hkam la mayu, shaga mayu ai mungkan masha yawng mai hkam la ai. Kashin Kamun hkam yang jai lang ai ga si ga ngau gaw ahkyak re. Chyoipra mying gang nna KAWA, KASHA, CHYOIPRA AI WENYI a mying ning sang hte chyu sha hkam ya/la mai ai. Kashin kamun gaw Chyeju Chyinghka re. Lu la gring ai chyeju ahkaw ahkang yawng hkam la lu na matu nta nhku de shang wa, hpung shang wa, Karai a Kasha tai wa ai lam rai nga ai.

Naw matut na, . .

Madi madun: CCC, Holy Bible, History of the Catholic Church.

 

WA JAU MICHAEL MYINT AUNG @ MARAN HKUN SENG ASAK (56), JAU PRAT 25 NING A MAKOI MAYANG POI LAMANG KA MATSING.

 

WA JAU MICHAEL MYINT AUNG @ MARAN HKUN SENG

ASAK (56), JAU PRAT 25 NING A MAKOI MAYANG POI LAMANG KA MATSING.

Dinghku lam.

Wa Jau Michael Myint Awng hpe Mone Hla mare kaw nga lai wa sai, Kawa Slg. Greogry U Lun hte Maria Daw Tuk yan kaw nna 1964 ning February 9 ya shani Monyin Ginwang Nyaung Dung mare kaw shangai wa sai rai. Hpunau ni marai masum hta na Wa jau gaw Kahpu kaba rai nga ai.

Jinghpaw Mying

Myen amyu sha raitim, Maran kasha ngu Slg. Salaw Tu Mai dum nta masha ni hku nna Jahtawng htu la nna Shd. Maran Hkun Seng ngu ai amying shingteng hkam la let, Jinghpaw Mung Myitkyina Sasana kata hta Sasana magam gun hpai ap nawng lai wa sai rai.

Jau aya hkam la ai lam.

1995 ning, March Shata 9 ya shani San Columban Nawku Htingnu, Aungnan kaw, Wa Saradaw Kaba Paul Zinghtung Grawng a lata hta, htani htana jau aya hkam sa rai sai.

Hpaji madang.

Hpaji hkaja ai lam hta, Roma mare kaba de du sa nna Moral Theology hpaji hpe madung dat hkaja la sai rai.

Magam gun hpai lai wa sai shara ni.

Kachyi Htu jau ginwang, Monyin jau ginwang, Mogawng jau ginwang, Danai jau ginwang, Katha jau ginwang ni nhtawm, nnga mat ai ten hta Covid -19 Response Team hta Wenyi lam woi ai lit magam hta shakut nga ai rai.

Jan shata shang, Madu hta wundoi mat wa ai lam.

          Wa Jau Michael Myint Aung gaw Jau tai ai 25 ning hpring Gumhpraw Jubili hkam la lu na matu shajin nga ai ladaw re. Shi hta Sinda chyat ( nsa sa chyat, Panna yawga) mung nga ai. Let mali, li loi machyi nga ai ahkying aten gaw loi na sai rai lu ai. 2020 ning August 7 ya shana gaw shi hte rau Covid -19 Response magam gun manang rai nga ai Wa Jau Peter Bunghku lawt naw hte Laykone St. Paul Nawku jawng, yup gawk kaw shana 11:00 pm ten du hkra rau ga shaga let yup ra shang mat ai re lam chye lu ai. Hpang jahpawt, August 8, 202 ya jahpawt 4:00 am ten Madu hta yup pyaw mat sai rai.

Hkum tsawp moi mang makoi mayang lamang.

Shi a moi mang hpe San Columban Nawku htingnu de la wa nna, Wa Saradaw Francis kawn Zuphpawng woi galaw let Komiti hpaw la nhtawm makoi mayang hpawng hpe tsawm htap ai hku galaw ya dat saga ai rai. Covid-19 ana makawp maga ra ai majaw Masha gara ai hku nna, 8/8/2020 ya shani kawn 10/8/2020 ya shani 10:00 am ten makoi mayang Missa hte rai yang Missa Hkungga (7) lang Nawng ya nna Rada kawng de makoi mayang di saga ai rai. Shang lawm ai Hpung masha gaw Missa shagu na hpe sawn yu yang (10,000 ) daram rai na re ngu tak lu ai. Moi mang makoi mayang ai shani gaw masha (4,000) jan rai na re ngu sawn lu ai. Wa Saradaw hte Jau ni (70 ) daram shang lawm lai wa sai.

Jaw lu jaw sha ai lam.

Hpung masha ni jaw ai Dumsu, Wa, N-gu ja gumhpraw ni hte shawa hpe muk, hka, shat lu sha ni shadu jaw sha saga ai. Sumtsan manam ni hte amu galaw ai ni, jau,mama, sara ni hpung a kanu kawa myitsu ni hpe gaw, Sarama Morine woi awn nna shat malu masha hparan ya sai rai.

Covid-19 makawp maga lam.

Ndai makoi mayang poi laman hta, Corona ana ninghkap, makawp maga lam hpe mung Asuya hkam ja dap hte seng ang ai ni a matsun hte hkrak hkan galaw saga ai. Masha shagu hpe Mask shakap ya, Hand gel hte lata kashin ya, Thermometer katsi kahtet shadawn ya, Missa langai hte langai lapran tsi gat, hkran hkran dung ai lam ni galaw saga ai rai.

Myitdum akyu hpyi hpyi lamang.

          Wa Jau nnga mat ai bat mi hpring myitdum Missa Hkungga hpe San Columban Nawku Htingnu kaw sha nhtoi 13/8/2020 ya jahpawt 6:30 am ten Wa Saradaw woi awn nna jau ni 28 hte hpung masha ni 250 daram, Wa jau Myint Aung a dum nta masha ni lawm rai nna galaw la lu sai. Shat kada hpe shatapru kaw nna htet nhtawm jaw sha sai rai.

Garum alu.

          Wa jau Michael Myint Aung a makoi mayang poi hta Arung arai, dusat hte  gumhpraw mung  law law hte garum la msai rai. Naw Ngam nga ai Alu ja gumhpraw hpe Nhtoi  12/8/2020 ya jahpawt 10;00 am ten, Ginjaw Mungbawng rung kaw Wa saradaw hte jau ni, Sara ni, hpung myitsu ni a dawdan minutes hte maren, jau ni a matu hpaw tawn da ai Hta wara  Pade tapyin de bang da sai rai.

Chyeju dum ai ga.

          Wa Jau Michael Myint Aung a Makoi mayang poi hta, Wa Saradaw Francis Daw Tang lam woi, lam matsun ai hte maren lam amyu myu hku nna shang lawm, ap nawng lai wa sai ni, garum shingtau lit la ya sai chyeju madu ni yawng hpe Myitkyina Sasana hku nna Chyeju dum masat shagrau dat ga ai rai.

Ka matsing ai- Sara Yawhan Nhkum Naw Seng. 15/8/2020.

 

 

SARADAW PAUL GRAWNG KANU YAN KAWA A NTSA TAWN DA AI MYIT MASA

 NU YAN WA A CHYEJU.

Wa gaw (Tara Hkaw Sara Claude Zinghtung Gam) ya sha, ya sha hpung kawan sa ai hpe, ngai nnan dum wa ai kaw nna ma a myi hte mu lu ai. Grup yin mare kahtawng ni de, nat kabai kau na matu, hkungran poi, ma hkalum poi a matu, machyi masha kawan na matu, mang makoi poi a matu, htingshawn shang poi a matu, shat nnan sha poi  ni a matu, akyu hpyi ga hte makam masham sharin na matu - lam amyu myu a matu, shana shaga ai shara de du hkawm shakut ai hpe mu lu ai.

Shi a dum nta, mare buga kaw mung, chye chyang ai made, du dep lu ai made shaja sa wa ai gaw, shi a kamsham tsawra myit hpe hkan shadik ai rai na sai ngu mu la lu ai.

Nu (Anastasia Lazum Htu) mung, dum nta, mare buga bungli hte hpung hta ra ai bungli ni hpe, shingdu de nga nna, atsin sha hparan lajang, gun hpai garum ai hpe dum lu ai. Asak 35 ning hta gaida mat ai kaw nna mung, dai hte maren dingyang rai nga ai.

Madu Karai Kasang bang ya ai Nu yan Wa a DING HPRING AI MYIT, KAM SHAM AI MYIT hte SUMNUNG ai myit ni gaw shan a kashu kasha ni a matu kasi kaja sinli wunli rai nga ai. Dai chyeju kaba la nga ai hte, dai ni du hkra grin nga ai ngu nna kam ai.

Shan a marang e, Wa Karai Kasang a shaman chyeju hpe daini shakawn shagrau lu nngai.

Shamyet; Saradaw Paul Zinghtung Grawng a Jau tai ai 25 ning hpring Jubili Poi masat dingsat. 1965 - March -27-1990.

1977 JINGHPAW MUNG HPUNG MASHA JAHPAN

1977 ning ten Jinghpaw Wunpawng Buga Saradaw a lata de San Columban Sasana hpung ni  ap ya ai Nawku hpung jahpan.

1.   Hpung htinggaw                     -  11,833

2.    Hpung masha yawng              -  59,169 

3.    Kashin Kamun lu sai ni           - 44,350.

4.     Kashin Kamun nhkam lu        - 14,819.

5.    Tara Hkaw Sara ni                   - 206

6.     Hpaji janmau lu ai ni              - 80

7.    Buga mama ni                          - 38 

8.    Buga Jau ni (Diocesan)            - 10

9. Buga Saradaw (Local Ordinary) - 1  ( Wa Saradaw Paul Zinghtung Grawng ) 

Wa Saradaw John Howe gaw Myitkyina Sasana a Sagu rem aya hpe Wa Saradaw Paul Zinghtung Grawng hpe ap da ya nna  Ireland Columban Sasana Ginjaw dum nta de 1979 ning hta jau ni hte hpawn wa mat sai rai. 

Buga Nawku hpung hpe Wa Saradaw Paul Zinghtung Grawng woi awn nna, Buga jau ni, mama ni, Brother ni, Tara Hkaw sara ni, Hpung myitsu Mungbawng Komiti ni woi awn hpang wa sai rai.

Shamyet ai; Saradaw ginwang hpaw poi hte Saradaw nnan shatai poi masat, MANMAW KAHTAWLIK SARADAW GINWANG A SHINGDU LABAU, Sara Nhkum Tang, Dip shapraw ai Poi shabyin shatai Komiti. December 17,2006. Manmaw.

GINJAW MUNGBAWNG RUNG HKINGDAT

GINJAW MUNGBAWNG RUNG HKINGDAT

 

San Columban Cathedral, Htap  masum Mungbawng Htingnu

Gawk masat (01) Ground Floor. AungnanYeiktha, Myitkyina, Kachin State.

Phone-(+95)0742523989, 09448610172.

Email:myitkyina.mbs@gmail.com.

Web: www.myitkyinasasanna.blogspot.com

SHAGRAU SHA A HKRUM LAI WA SAI TARA HKAW SARA NI

1. TARA HKAW SARA JEROME PALAWNG AWNG LAT

Tanai Jau ginwang, Awng lawt mare.

Shagrau sha a hkrum ai Ningja mying

"HKRISTU A KANGKA AI SHANGUN MA" 

2018 ning, May shata 28 -31, ya laman Myitkyina Tatkone sanpra mare kaw, Myitkyina Sasana Jau ginwang 21 kaw na Tarahkaw sara ni 40 jan a datkasa zuphpawng hta shagrau sha a lai wa sai rai.

Tara Hkaw Sara Jerome Palawng Awng Lat gaw; 2015 ning, April Shata hta Tanai mare kaw majan byin wa ten, Tanai Jau ginwang,  Awng Lawt mare masha marai (200) jan hpe Danai mare de lu pru wa hkra nam lam hku Chyoipra Hkum lakawn lang, hpai hkawm akyu hpyi nna woi awn lai wa sai Tara Hkaw Sara rai nga ai. Nam kata shata mi jan na hkra hkawm  sa woi nna Danai mare de du wa ai lam chye lu ai.

2. TARA HKAW SARA KABA NLAM GAM LI

Myitkyina Jau ginwang, Edin mare a Lit Hkam Sara, San Luka Chyum Hkawlik a Laika Sharin Sara, Tara Hkaw Sara Ginjaw Komiti a  Ningbaw ni hku nna shaning law law ap nawng lai wa sai Tara Hkaw Sara re. Makam lam hta Kri tai, Kanu kawa tai, kasi kaja hte woi awn lai wa sai re majaw shagrau masat laika hte shi a Tara Hkaw Sara tai ai (50 ) ning hpring Ja Jubili poi kaw shagrau sha a sai rai.

"MAKAM A KASI NINGLI KAJA" 

Sara Kaba a Ja Jubili poi kaba hpe San Luka Chyum Hkawlik, Edin mare kaw 2018 ning December 19 ya shani grai awng dang ai hku galaw la lu sai rai.