KAHTAWLIK NAWKU HPUNG A NAWKU JAWNG HPAN

 1. Basilica Nawku Htingnu

    Ndai gaw Madu Yesu Hkristu, Nu Maria hte san Pra ai ni hte seng ai Sawm, Nrut nra, Arung Arai lama ma bang da, lup da ai Nawku jawng langai rai nga ai. Major Basilica Kaba ( 4 ) sha nga ai. 1. San Petru Basilica Nawku Hting Nu ( Roma ), 2. San Paulu Basilica Nawku Htingnu( Roma ), 3. San Yawhan Lateran Basilica( Roma ), 4. San Maria Kaba Nawku Htingnu ( Roma ) ni rai nga ma ai. Minor Basilica Kaji ni gaw law law nga ai hpe mu lu ai.

2. Cathedral Saradaw a Tingyang Nawku Htingnu.

    Nawku jawng kaji tim, kaba tim, Saradaw Dung nna woi awn, up hkang ai Nawku htingnu rai nga ai. Duomos or Center, Ginjaw ngu na shara rai nga ai. Wa saradaw gaw Ndai Nawku Htingnu kaw nga nna, Saradaw ginwang ting hpe Up hkang, Shachyoi Shapra, Sharin shaga nga ai.

3. Church. Nawku jawng.

Ginwang up Jau ni dung ai Nawku jawng or  Shawa a matu Missa nawng nawng re ai Nawku jawng rai nga ai.

4. Chapel. Akyu hpyi gawk, Nawku jawng kaji.

Shawa a matu masat da ai shara n re. Jau tai jawng, Chyum jawng, Mama tai jawng, Boarder, Sasana nta ni, laika sharin jawng, Dakkasu, Hkawlik, Tsi rung, Hpyen dap ni hkan tinang wuhpung a matu, masha loi mi a matu san da, masat da ai Akyu hpyi shara rai nga ai.

5. Adoration Chapel. 

Chyoipra hkum or Madu Yesu a hkum  hte sai hpe tawn da nna, kam sham ai hpung masha ni sa Nawku shara, sa Akyu hpyi na shara rai nga ai.

6.   Ginra Nta. Tara Jawng.

Sunday School, Tara Laika, makam masham sharin na shara re. hpung  masha ni a Shinggyim bawng ring lam hte seng ai lam, kabu gara poi, yawn hkyen poi hte buga masha ni a shamu shamawt lam ni galaw ai shara rai nga ai. 

7. Grotto. Nu Maria Lungpu.

Lourdes Mare na Lungpu kaw Madu Yesu a kanu Maria gaw san Bernadette hpe shadan dan ai hpe kumla hku la nna Rosary hti ai lam, Novena galaw ai lam, Nu Maria poi ni hpe galaw ai lam ni hpe Ndai Nu Maria Lungpu a lahpyen kaw galaw chye nga ga ai rai.

 

MYITKYINA SASANA A SAGU REM NNAN JOHN MUNG NGAWN LA SAM

 

Myitkyina Saradaw ginwang hta ra kadawn nga ai Saradaw ningnan a matu 29 October 2024 ya shana de Myanmar Mung gindai ahkying ( 5: 30 ) aten Wa Sarabyin Francis kawn Wa Jau John Mung Ngawn La Sam ( MF ) Shadau ginwang up hpe Saradaw tai na lata dang dat ai lam ndau shana ya sai. 

 

 

WA SARADAW JOHN MUNG NGAWN LA SAM A LABAU KADUN

---------------------------------------------------------------

 

Wa Saradaw gaw, April 27, 1973 ya shani, Lashio Saradaw Ginwang, Moe Gok mare kaba kaw Slg. Petru Mung Ngawn Seng Du hte Jan Elizabeth Sing Nan Pri Ja  yan kaw nna shangai wa ai.

Wa Saradaw a Chyu rum hpu nau ni gaw - 1. ( Du Paulu Mung Ngawn Zau Ring )+ Cecilia Nhkum Kai Seng, ya ten Laiza, 2. Yaku Mung Ngawn Ja Naw + Rita Lazum Hkawn Lung, ya ten May Myint, 3.  Andrew Mung Ngawn Tu Mai + Elizabeth Dashi Hkawn Tsin, ya ten Du mare , 4. Augustine Mung Ngawn Bum Hkrang +jan Hpauda Seng Bu, ya ten America kaw re, 5. (Emily Mung Ngawn Seng Pan, kaji ten si sai ) ni rai nga ma ai.

Missionary of Faith ( MF ) ngu ai Jau Wuhpung hta 8 September 2014 ya shani shawng ningnan na Ga Sadi hpe hkam la ai.

16 Janauary 2016 ya shani htani htana Jau aya hpe Myitkyina Saradaw ginwang Alam Wudang Bum lagaw St. Peter Nawku Jawng hta hkam la ai.

Myit sawn hpaji ( Philosophy ) hpe Pyin Oo Lwin, St. Joseph’s Major Seminary jau tai Dakkasu jawng hta sharin hkaja la ai.

Karai Kasang hte seng ai hpaji ( Theology ) hpe Roma mare na,Pontifical Lateran Dakkasu jawng hta hkaja la sai.

Magam gun ai shara ni :

2016 – 2017 du hkra St. Columban’s Cathedral, Myitkyina;

2017 – 2024 ya aten du hkra Shadau Jau Ginwang a Ginwang Up Jau magam hpe gun hpai nga ai.

Saradaw shatai ai hpe January 12,  2025 ya shani,
San Luka Chyum Hkawlik, Edin, Myitkyina kaw hkik hkam ai hku Wa, Saradaw Kaba, Cardinal Charles Maung Bo a lahta hta hkam la lu sai rai.

Wa Saradaw Gaw, Jinghpaw Wunpawng Amyu sha ni hta 6 ngu na Buga Saradaw re.