1. shangai chyinghkai wa ai lam
4. Jau aya hkam la ai lam
Shawng de Mali Nmai Wa Lawng Njang Yang Ning Htawn, Pali mare kaw 1960 ning August shata 08 ya shani, Kawa sara Stephan Gumrai Gam hte, kanu Dorothy Lama Ja Nan yan kaw nna shangai wa sai rai. Kahpu kanau ni;
1. Jau Thomas Gumrai Awng
2. Monica Gumrai Kaw Bu + Law Lai Gumja Naw
3. Patrick Gumrai Lawt Naw + Lalawng Lu Bu
4. Petru La Sam + Mary Labang Kaw Ing
5. Gumrai Roi Nu + Shan Rawng La Dut
6. Gumrai Tu Hkawng + Myitung Htu Seng.
7. Mama Magaret Rosy Htu Hkawng (SFX, Roma).
8. Benedett Kai Ling + Petru Nhtung Hka Brang Mai.
2. hpaji hkaja la ai lam
Tsang (4 ) du hkra N-greng Kawng mare, Tsang (5 -7) du hkra Manmaw, Kokkudaw SHS 2, kaw lung la sai. Tsang 8-10 hpe Myitkyina, SHS 2 kaw lung nna 1982 ning hta Tsang 10 awng la sai. Asuya Dakkasu kaw B.A (Geo) hte Jan mau gup la lu sai.
Jawng ma ten hta, ning tawn ai lam; Gaw din ginsup ai hta mungdaw madang ginsup ninghkring tai lai wa sai. Hkrang pan (sumla soi) ai lam hta grai ningtawn ai hte Music hta ningtawn nna Base Guitar dum, Choir hta Base hkan lai wa sai rai.
3. JAU TAI JAWNG lung HPANG WA AI LAM
1977 ning hta, Aung nan Minor Seminary nga hpang sai. 1982 August 12 ya shani Brother Palawng hpun la lu sai . 1982– 84 Yangon hte 1984-85 du hkra Pegu St. Joseph’s Major Seminary ni hta karai hpaji hkaja la nna B. Th hte B.A (Philo) Jan mau ni gup la lu nu ai rai.
Mung masa npyaw wa ai majaw hkring sa nga ai ten 1986 – 67 ning Hta Putao Jau ginwang de sa du nna mama ni hpe mam hkai garum ap nawng lai wa sai. 1988 ning hta Tanghpre Ginwang up jau Paul lasang la kaw nga nna ap nawng shakut shaja ap nawng lai wa sai..
1990 ning hta Jawng bai hpaw ai ten hta Pyin Oo Lwin de sa nna Philosophy matut lung la nu ai. 1994 ning hta Deacon Aya hpe hkam la lu sai rai.
1995 March 22 ya shani Tanghpre Jau Ginwang, Alam mare, St. Mary Nawku Jawng wang kaw Wa saradaw Paulu Zinghtung Grawng a lata hta, Wa Jau Micheal Myint Aung, Wajau Peter Nlam Tu Awng ni hte rau “Not to be served but to serve” ngu ai manoi ga hpe lashum nna, htani htana Jau aya hpe hkam la sai.
5. Gun hpai lai wa sai lit magam ni
1995 –1996 ning Jau aya hkam la ai hte rau Myitkyina Jau ginwang a Ningtau Jau hte Sara daw Ginwang Ramma Director Lit shatsam hkrum sai. 1996 May 18 ya shani Shatapru Jau Ginwang hpaw dat sai hte shawng nnan ngu na Lit Hkam Jau hku nna lit shatsam hkrum sai. Shatapru St. Patrick Jawng wang de gaw 1997 shaning nnan de she wa dung hpang wu ai rai. 2007 kaw nna Tanghpre Jau Ginwang a Lit Hkam Jau hte Tangpre Zone a Jau kaba Episcopal Vicar, tai wa sai rai.
6. RAMMA DIRECTOR PRAT
1995 ning kawn, Myitkyina sasana Ramma Director Lit magam hpe shakut shaja nna, Ramma law law hpe shalat shaprat ai hta n-ga, Germany, Canada hte kaga mai gan mungdan law law de du sa nna, WYD ni hta sa lawm lai wa sai. W.P htung hking manau hpe mungkan ting chye hkra woi awn shakut lai wa sai rai. Myenmar mung kaw mung Youth Congress law law lang galaw woi lai wa sai rai.
7. JAU PRAT ( 19 ) NING HPRING SAI.
Tanghpre Jau Ginwang up lit magam hte, machyi makaw rai nga ai majaw maigan pru tsi tsi hkam la nga ding yang rai nga let, hpung kawan shaja nga ai ten, 2013 ning May 25 ya shana maga 2:45 P.M. ten hta Madu Yesu woi la nu ai rai.
8. kasi kaja la mai ai lam ni
- Grai shagrit shanem chye ai. Ramma law law hpe shalat ai.
- Htunghking hpe manu shadan, shagrau sha a jai lang chye ai.
- Makyin Jinghku, Manaw manang ni hpe tsaw ra chye ai.
-Sasana lam hta Magrau grang, Ningja atsam kaba ai jau re
- Mali nmai hka madim hte seng nna tinang amyu sha ni myit ra ai hte maren byin wa hkra mung, hpung jawng wang ngang grin hkra woi awn ning shawn tai lai wa sai rai.
